SE FA PRESTO A DIR ‘VECI’….

I doman de drìo (in triestin)

Veci, veci,
Se fa presto a dir veci,
cossa sà i altri
del nostro vissudo?
De rifa o de rafa,
fin qua semo rivai
e col pìe ancora nela stafa
cavalchemo el tempo,
anca se più pian…
nissun pol dir
coss’che farà doman,
ma noi altri, almeno,
un pochi de doman
li gavemo zà de drio,

che i altri speti, prima de ciacolar!
No xe fazile diventar veci,
veder passar la vita soto i oci
e no poderla mai fermar,
per godersela, un pochetin de più,
se fussi come un nastro, o un dvd,
ogni tanto gaverìa stopado
e fussi tornado indrìo,
ma nel nastro dela vita
xe solo un verso, l’avanti,
e quel che xe sta, xe perso,
salvo che nel cuor,
nela memoria, in ela sola
e dove no esisti
nissuna moviola,
propio nela memoria
finché la ne sostien,
zercando comunque senpre
de esser pronti
per quel che ancora vien.
Veci i ne disi,
ma zovini semo stai!
Speravimo, ma no savevimo,
findove fussimo rivai,
e cussì el tempo gà fato el suo,
l’inportante xe no restar fregai
e pel resto chi sà mai?