El “talian” che no vol mia dir “italiano”, un post comovente de un Veneto del Brazil

De Darcy Loss Luzzato, Veneto del Brasil.

L’obietivo de sto artìcolo che ve scrivo l’è farghe un ringrassimento pùblico a FRANCO SOLDÀ.

I zera arquanti di che no camineva, no ndeva gnanca fora par el cortivo, ma sta matina go fato na pìcola spassegiada, go caminà pi che meno 1 km ntela strada vissina a casa mea.
Seri sentà, ancora stanco dela pìcola spassegiada, co ghe ze rivà me moier, che la zera ndada a la Posta (Correio, in brasilian). La gaveva in man una busta gialda, pi granda de quele par létere, che la vegneva de Recoaro Terme, Vicenza, Itàlia.

Ela la la ga verta e, súbito, ancora maraveiada de veder quel che ghe zera nte busta, la ze vegnesta, in corsa, ridendo, contenta, mostrarme quel che ghe zera dentro. Che belìssimo regalo: una bandiera dela Serenìssima, pi granda e pi bela de quela che gavei guadagnà, ani indrio, del Prof. Giovanni Meo Zílio! E nò sol che la bandiera, ma anca el film LEONE DE VETRO, fora altre cosete come bandiderete vénete par tacar su la màchina e altre ndove, co l’imàgine del Leon, se lese: LEON DE SAN MARCO, SIMBOLO DE PAXE E LIBARTÀ!
A, caro Franco, no te pol saver come son restà contento! Go vardà el film sùbito che l’è rivà. Un spetàcolo! Imagìnete, caro Franco, un omo vècio come mi, pianzendo intanto che lo vardeva. Mi gaveva notìssie de sto film par i diversi amissi che go ntel Vèneto, ma no saveva mia che l’era cossì bel e cossì vero! La ze la stòria dela nostra gente, màssima dela mea, che ghe ga tocà, come finisse el film, a partir, a ndar in serca de altre tere.

Qua i se ga stabilidi i mei noni che, come eredità, i ne ga assà la so bela léngua e la so milenària cultura! Co la caretina la ze partida, ntel final del film, me pareva de veder i nostri, in partensa verso un altro mondo, verso l’Amèrica, verso el Brasile!

Te ringràssio pròpio tanto, te ringràssio de cuor, tanto i nome meo come nte quel de me moier, Elisa, che la ze tedesca, ma la ze passionada par Venéssia e par la nostra cultura.
Ciao, caro Franco. Adesso che go la to diression sercarò de riméterte anca mi qualcoseta del nostro paese. Viva San Marco, sempre!!!!

http://www.emigrazioneveneta.com/