UN BEL Dì…. rènto in procura un tremon i ga ciapà:

In procura, poariti,
i s’à tuti scaturà
coi caviji tuti driti
un procèso i ga tacà!
Ma sti espèrti d’esperiença
sałi mìa ła difarença
fra na arma da paura
e na ruspa un fià blindà?

L’è na pàcara de cuełe

che te cati par łe strade,
coi so cìngołi e portèłe,
gnente sciòpi, gnent’ granade.
Ciò, da ndove spararàła?
Da łe ponte de ła pała?
Mi ła vedo pròpio dura
che ła s’àbia trasformà.

Xe l’Itàłia a far łe guère,
dè na ocià a sta łista cuà.
Ła gavea da tor łe tère
a cuei che ghe xèra za:
par far sù na pàtria sacra
łe Sicìlie i masacra
co procèsi a desmixura,
làger, zente fuxiłà.

Po, par inganar l’atexa,
el Sior Stato el ga pensà
de ndar far un giro in cexa,
ma ‘l ghe riva ben armà:
e co sto bel mortifìcio
rènto el Stato Pontifìcio
semenando copadura
tricołor el ga trionfà.

Po saltando via łe łèji
rènto el Vèneto i xe intrà
e coi sciòpi for’ dai seji
el Paexe i ga ciapà
sti Itałiani senpre scaltri,
profitàndose che altri
par far mostra de bravura
i ło ga za martorià.

Po l’Itàłia i Trentini
in Tirol ła ga atacà
A trar gas sui Abisini:
coi aèrei ła xe ndà.

Ła fa guèra ai Asburgo
po ła vol San Pietroburgo
e a łe guère de Mazzini
ła ghe ciama łibartà.

E co tuta sta gran guèra,
des’ se gałi ciò insustà
co na màchina da tèra?
Co sta pòra ruspa cuà?
No ła ga mìa mai invadesto
anesion no l’à faxesto
e i ghen’à na gran paura
come che ła fuse armà.