LA RISERVA DEI VENETI… AUGH…

Funzionava cussì: te cressevi, da picolo, e la maestrina (Pierina Polazzo, padovana) te sbachetava se te doparavi qualche parola veneta o te la segnava col rosso, nei temi. Bisognava parlar solo el talian e nei ani ’50, gera na gran fadiga, eh.. gerimo cussì poco ‘taiani, qua … 🙂 a Roma i faxeva film in cui el semo gera un carabiniere veneto o la serveta al servissio dei siori nea capital, par cui te te vergognavi, a la fine, de parlar la lengua de to mare.

Coreva la teoria, e anca adesso la funziona, par cui in Italia se parla i “dialeti” contraposti al perfeto “italiano”, e un puteleto pensava che el veneto fusse derivà dal ‘taian, la fusse cioé na coruzion de la legua uffizial. Insoma ne le comedie de Goldoni, quele scrite in venezian, i parlava un dialeto, cueo veneto, solo parché i gera dei ignorantoni.

(In efeti a sentir la politica De Girolamo, questo semo ancora: dei contadini ignoranti).

Che de le opere de l’ingegno veneto sia pien el Louvre no conta gnente, a quanto pare. Giorgione, a tanti altri se firmava nei quadri come “pictor venetus” ma questo no conta gnente.. tanto che Wikipedia scrive che i xe pitori ‘talaini.

Qua no so mia bon de capire ‘sta storia.. ma so tanto ignorante .. eo so … so veneto 😀 fa parte de la me natura. Go sentio che i verzarà la riserva,come par i indiani ‘mericani.