NA POESIA SPECIAE DE “NONO” GIGIO ZANON DEDICADA A GOLDONI.

Ogni giorno lo vedeva andando all’Aquila nera….. E iu ghe ga dedica’ una poesia (Elena Zanon)
Te vardo ogni matina
co passo vissin de ti
vorìa par un pocheto
che ti venissi zo co mi.

Ti xè senpre in’alto
col tempo bruto o béo
col to baston in man
e in testa el to capèo.

Na volta,digo,na volta
qualcossa ti disessi….
caro Goldoni mio,
ma parlar, ostregheta,
no te gò mai sentio.

Scusime sa, Goldoni,
se questo te gò dito,
parlar no ti pol in fondo,
parchè ti xe de bronso.

Se ti. podesi parlar
sò più che sicuro
che da sto to nonunento
quei che comanda
ti li mandaresi aremengo.

Me piasaria tanto
Parlar co calchedun
de sta cara mia Venessia
ma no trovo mai nissun

Vien zò, vien co mi
par sta nostra bea cità.
insieme parlaremo
de queo che vedareno.

Andeno par Venessia
tacai a brasseto
ma sì, co la fiacheta
tanto,no gavemo pressa.

Sarà anca par ti
credo, un gran dolor,
veder la to Venexia
in ste condission ridota.

Mi penso,Siorìa lustrissima
che al tenpo dea Serenissima
Venexia par quanto sìa,
la sia stada più ben tegnìa.

No xè più come prima
tuto xe in rovina
dele volte, ala bona
un poco i la tacona.

Pasiensa digo mi
de tuto sto bordèo.
Ma quà, boja can,
xè tuto in sfasseo.

Co sti motoscafi,
i core come mati
cussi, i cavaloni
rovina e fondamente
i porta via i matoni.

No ti vedi ostregheta
Che ponti, palassi e rive
i xè mal ciapai,
tute quele sfeze e busi
caspita: i andarìa stropài.

Andando de sto passo
dove andarerno finir,
caro e mio caro Goldoni:
de sicuro, a rodoloni.

Eh,sì caro Goldoni
questa xè là verità,
quei siori,per Venessìa
poco i ga pensà e poco i pensa.

No ti vedi benedeto
che scura che xe e piassa
co quei sìe padeoni
ne toca caminar a tastoni.

E le scoasse
Da par tuti i cantoni!
E dai muri, che vien zò
De chei crostoni…

Quante volte, ostrega,
de ste robe se gà parlà,
ma, lori alsa e spae
e credime: no diso bae!

Nissun se intaressa,
par che i fasa a posta,
parlar no i vol, sentir manco ancora
E Venessia i vol far morir.

I fa ponti novi,
che no serve
a gnente, ma i ne fa
spendar tanti milioni!

E cossa dir de la nova idea,
de sbusar la Laguna,
cussì tanto bea,
par metarse ancora schei in scarsea?

Bastaria tanto poco
Par tirarla un poco sù!
No so,se me sbalio
Cossa ghe ne dixè Vù.

“Gò visto, gò visto tuto
Sò zà beo che stufo,
no speto più un momento,
torno al me monumento!”

Bondì caro Goldoni,
sò contento e sodisfà,
grassie de la to compagnia
e grassie a chì m’ha scoltà.