DA SAN MARCO A SAN MARCO. VENETI E SUD TIROLESI PRESENTI, MA IL PATRIARCA NO.

Xe sta dei gran momenti, par quei che ghe gera, ma anca par i tanti che no ze riussidi a movarse, come mi. Go vardà le foto, i volti commossi e entusiasti de diversi amissi, le uniformi storiche (magnifiche cuele dei fradei del sud Tirolo, eh…amirevoli per l’impegno marzial i amissi del Veneto Real)  ma go notà la non presenza del Patriarca. El Patriarca che rapresenta San Marco, che ga evangelizzà par primi i Veneti, ma anca el resto de le popolazion de le Tre Venezie, composte, da tempi antichi de Nazioni diverse.

La presenza dei sud Tirolesi anca questo ricordava. San Marco no gera rivà par anullare le tradizioni e legue dei popoli che se saria convertidi, ma par formare na fameja unica soto la crose de Cristo, soto l’insegna del “Lion”. Un messagio Universale, che anca ieri, gera testimonià da l’afratelamento dei Veneti e dei Tirolesi, che aspira solo a difender la propria Tradizion, la propria Autonomia, la propria Libertà. 

L’assenza  Sua, caro Francesco Moraglia, la pesava tanto, in quel momento de fratellanza identitaria: pareva a mi (e credo a qualche altro) che el ne dizesse: mi no ghe entro, co ‘sta storia de la difesa de le identità dei vostri popoli, no vogio saverghene.  E tanto più invesse lu dovaria esser sta presente, parché el Papa, La ga messo a capo dei Veneti cristiani, pur essendo un genovese. Che se non sbaglio, par secoli la ze stada la rivale e la nemica de Venezia.

Lu ne dirà che no semo più a l’epoca de le Crociate, d’acordo… però serte scelte ga un valore enorme, se le xe cariche de storia. Par quasi, el me perdoni el pensier, che i papi novi, che ga ribaltà anca i altari, dizesse ai Veneti:

sentì, fioi, le ze robe vecie, le vostre. sorpassà dai tempi. La Serenissima no esiste più, stè boni e muti, no stè a romper i cojoni (el me scusi, Eminenza.. ) co sta storia de l’indipendenza. Semo tuti taliani, adesso. Rassegneve, paghè le tasse a Equitalia, tirè la careta, come al soito, e continuè a farve rapinar a l’insegna del tricolor, a suicidarve, a far posto ai clandestini, anca se i ‘taliani no ve permete, in cambio dei vostri sacrifici sempre più grandi, manco de gnente. E i fa de tuto parfin par scancellar la vostra bela lengua, che parlé almanco dal IV secolo dopo Cristo. 

Ecco, caro Francesco Moraglia, me fermo qua. Spero che la Segreteria Sua leza ‘ste do righe. Scrite in lengua veneta, la me scusi, no volevo mancar de rispeto a un genovese… ma la ze la lengua del so gregge… sempre più tosà dal paron. Ma sucede che ogni tanto, anca le piegore se incazzi.

Co rispeto filiale

Millo Bozzolan, veneto marciano.