I personagi de pra dea Vae: MELCHIORRE CESAROTTI – statua n° 32

Di Millo Bozzolan (Milo Bossolan)

Sto personajo, tanto celebre al so tempo, xe nato el 15 majo 1730.
Fato prete, l’è sta professore nel Seminario Vescovìe, passando po’ ałe catedre de greco e ebraico dea nostra Università.
El stava de casa nea via che desso porta el so nome, al nùmaro 10, come che ricorda ‘na lapide detà da Carlo Leoni. Sta casa gera celebre in chei tempi parchè se tegneva memoràbii convegni dai più ilustri professori del’Università e anca pa’l continuo ‘ndare e vegnère dei più grandi leterati e poeti: Ugo Foscolo, Vittorio Alfieri nel 1783, Madama de Stael nel majo del 1805 e Vincenzo Monti nel lujo del 1808 pochi mesi prima chel morisse.
Gera tanta la considerassión che gheva Cesarotti, chel se ga merità el titolo de “professore sopraordinario”, rarissima quałìfica dà ai docenti che se distingueva pa’l servissio longo e onorà.
Tanto e in vari modi xe sta discussa, dopo, la so òpara de omo de cultura.
Comunque l’òpara più rinomà xe sta la tradussión dei Canti di Ossian, scriti in versi sciolti, sonori, fantastici e inpetuosi del scossexe James Macpherson.
Cesarotti xe morto nea nostra sità el 4 novembre 1808 e la so statua xe sta fata nel 1821 dal scultore de Marostega Bartolomeo Ferrari su comissión del patrissio venessiàn Giacomo Gradenigo con l’intensión de farghe métare el simulacro de un Gradenigo xà podestà de Padova. Questo però no xe mai sta fato.

fonte http://www.sotoiporteghi.it/2011/11/le-statue-del-pra-dea-vae/