PARLEMO NA LENGUA, ANCA SE I LA CIAMA DIALETO

BONDI’ cari, come forse savì, in ogni comune del Veneto xe deposità £a proposta de lege par el riconosimento (anca in Italia) de £a lengua veneta, parlada da milioni de persone in tuto el mondo. E l’asurdo xe che in Brasile la xe na lengua ufizial, anca se i la ciama “‘talian”, ma el riconosimento adeso el rivarà anca par l’istro-veneto, da parte slovena, sensa che in Italia se mova foja. Se sa mai che i Veneti se meta in testa de eser on popolo co na storia vecia de 3200 ani… co quel che seguiria.

Femo na bea roba, andemo in comune a firmar, de corsa.

Ve meto intanto ‘sta bea poesia che toca proprio ‘sto tema e invita a on novo orgolio “mai vergognarte de parlar el to dialeto… (ansi, la to lengua) ” de Leda Ceresara, de Sarcedo Vicenza.

PARLAR VENETO

No sta mai vergognarte
parlare el to dialeto,
l’è el modo pì parfeto
pa’ dir da indòe te vien.
L’è odor de la to tera,
sugo de’e to raise,
el to parlar me dise
che veneto te sì.

El dire tuo l’è musica,
l’è un canto che consola,
fruto de chela scola
che i veci te ga dà.
pàrlalo in casa e fora
pàrlalo ciaro e s-cieto,
l’è belo el to dialeto
par chi lo sa scoltar.

No assàr che se disperda
le storie e le cansòn,
proverbi e tradissiòn
avù in eredità.
Fina da pena nato
co’a prima nina-nana
sul core de to mama
ti te lo ghe inparà.

Sto gergo te ricorda
el caldo fogolare,
parole dolse e care
tel core rancurà.

Te poi saver le lingue
de tuto el mondo intiero
ma el to parlar pì vero
dialeto restarà.